ഗുദാസ്ഥി നശിക്കുന്നില്ല...!

മനുഷ്യൻ മരിച്ചു മണ്ണായ ശേഷം അവനെ പുനർജീവിപ്പിക്കാൻ കഴിയില്ലെന്ന് വാദിക്കുന്ന ആളുകളുണ്ട്. അതിനു വേണ്ടി തന്നെയായിരിക്കണം അല്ലാഹു മനുഷ്യ ശരീരത്തിൽ അദ്ഭുതകരമായ ആ ഭാഗം നിക്ഷേപിച്ചിരിക്കുന്നത്. നട്ടെല്ലിന്റെ ഏറ്റവും അടിയിൽ സ്ഥിതി ചെയ്യുന്ന ഗുദാസ്ഥി(Coccyx)യാണത്. ഭ്രൂണത്തിന്റെ ഭാഗമായ അതിൽ നിന്നാണ് അവന്റെ ശരീരം രൂപംകൊള്ളുന്നത്. അതിലേറെ അദ്ഭുതം മനുഷ്യ ശരീരം മരണശേഷം ദ്രവിച്ചു ഇല്ലാതാകുമ്പോഴും ഗുദാസ്ഥിമാത്രം നശിക്കുന്നില്ല. 1400 വർഷങ്ങൾക്ക് മുമ്പ് പ്രവാചകൻ മുഹമ്മദ് നബി(സ) പറഞ്ഞ കാര്യമാണിത്. ഈയടുത്ത കാലത്താണ് ആധുനിക ശാസ്ത്രം ഇതിനെ ശരിവെച്ചിരിക്കുന്നത്.

നബി(സ) പറയുന്നു: “എല്ലാ മനുഷ്യരെയും ഭുമി ഭക്ഷിക്കും ഗുദാസ്ഥി ഒഴികെ, അതിൽ നിന്നാണവൻ സൃഷ്ടിക്കപ്പെട്ടിരിക്കുന്നത് അതിൽ നിന്നാണവൻ (പുനർ)നിർമ്മിക്കപ്പെടുക” ശാസ്ത്രത്തിന് ഈയടുത്ത കാലത്ത് മാത്രം മനസിലാക്കാൻ കഴിഞ്ഞ ഒരു ശാസ്ത്ര യാഥാർഥ്യമാണ് ഈ ഹദീസ് ഉൾക്കൊള്ളുന്നത്.

ശാസ്ത്രജ്ഞരുടെ ഒരു സംഘം നടത്തിയ പരീക്ഷണങ്ങളിലൂടെ സ്ഥിരപ്പെടുത്തിയ കാര്യമാണിത്. ശക്തിയേറിയ ആസിഡുകളും, കഠിനമായ ചൂടും, പൊടിച്ചു കളയാനുള്ള ശ്രമവും, വ്യത്യസ്ത കിരണങ്ങൾക്ക് വിധേയമാക്കലുമെല്ലാം അവർ പ്രയോഗിച്ചു. അവക്കൊന്നും അതിനെ നശിപ്പിക്കാനുള്ള കഴിവില്ലെന്ന് വ്യക്തമാക്കുന്നതായിരുന്നു ആ പരീക്ഷണങ്ങളെല്ലാം.

മനുഷ്യ ശരീരം നശിച്ചു കഴിഞ്ഞാലും മനുഷ്യനെ  ഇല്ലായ്മയില്‍ നിന്ന്‍ സൃഷ്ടിച്ച അല്ലാഹുവിനെ സംബന്ധിച്ചെടത്തോളം അവശേഷിക്കുന്ന ഗുദാസ്ഥിയിൽ നിന്ന് അവനെ ജീവിപ്പിക്കുന്നത് വിത്തിൽ നിന്ന് സസ്യത്തെ മുളപ്പിക്കുന്നതിനേക്കാൾ എളുപ്പമായിരിക്കും.